(وطن- خاص)- ستة أيام مرت منذ بداية شهر رمضان المبارك، كانت لها نكهة مختلفة على موقع التواصل الاجتماعي “فيسبوك” الذي انتشرت على صفحاته منذ اليوم الأول عشرات المواقف الطريفة والمضحكة والغربية التي عاشها النشطاء خلال هذه الأيام.
وكان شهر رمضان أيضا كفيلا باستعادة عشرات المغردين لذكريات مضحكة عايشوها خلال هذا الشهر قبل عدة أعوام.
“وطن” رصد بعض المشاركات على موقع “فيسبوك” التي تحدث النشطاء فيها عن مواقف وذكريات مضحكة وغريبة مرت بهم خلال شهر رمضان.
الناشط المصري “أحمد علي” كتب على “فيسبوك”: “من العلاقات المشبوهة في رمضان وقت الصيام انك تكون انت وازازة الميه في الأوضة لوحدكم”.
وفي استعادة لذكرى قديمة، شاركت “سلمى بهاء” على “فيسبوك” موقفا عايشته في المرحلة الابتدائية: “انا لما كنت في ابتدائي كنت اقول لماما انى بصوم وكنت قبل ما اروح المدرسة اخد ازازه مية فمره لما رجعت من المدرسة ماما لقت الازازه في شنطتى وهيا فاضيه لقياها بتسألنى يتعملى بيها ايه قولتلها كنت بروح اسقى زرع المدرسة عشان امهم ماتت”.
أما “آية سامي” فتحدثت عن موقف طريف مر مع شقيقها الأصغر: “اخويا الصغير ف 4 ابتدائي دخل يتوضأ وهو صايم فضل كتير ف الحمام لما خرج ماما بتقلوا: إنت شربت يا محمود … بصلها بصه زعل بنرفزه غريبه اوى وقلها بكل ثقة: هي مية الحمام بتفطر”.
أما “سلامة عبود” فشارك موقفا طريفا حدث معه: “يعني اي مصر ؟ … يعني ولد بيوزع بلح وعصير ساعة الفطار على راكبين عربيات في الشارع، فواحد بقوله شكرا أنا فاطر فرد عليه قاله يعني انا الي صايم”.
وفي موقف غريب وطريف، قالت سمر أسامة: “أجمل موقف في رمضان زمان لما كنت صغيرة اوي وتيجي جدتي تعالي اتغدي اقولها لأ هستنى المدفع كل ده عادي الي مش عادي اني مسيحية وأفضل واقفة في البلكونة استنى المدفع وادان المغرب والفوانيس تنور تقوم هي جيبالي الأكل وتقلي المدفع ضرب أهو وعمرها (الله يرحمها) ما قالتلي لأ احنا مسيحيين ورمضان مش بتعنا بالعكس كانت هي وجيرانا أطباق الكنافة والقطايف طالعة نازلة”.
المسيحي ميخائيل داوود كان له موقف طريف في رمضان، فقال: “طلعت لقيت امي عاملة بطاطس محمرة رحت نزلت كلت في مائدة الرحمن واكلت فراخ لا وقبل ما ادخل المائدة الراجل بقلي اتفضل بقوله ما انها هتفضل بس انا مسيحي قال عادي يا عم، وفي وسط الاكل لقيته بقلي يا ميخائيل عايز حاجة تاني ؟ بصوت عالي لقيت الناس كلها بصالي قولتهم والمصحف هو قالي تعال كول”.
بوست آخر لـ”اندرو عادل” قال فيه: “بعد ما تصوم طول النهار في الشغل احتراما لمشاعر المسلمين الي معاك وبعدين تلاقي امك عملالك اكلة فول وطعمية وعدس او بصارة علشان صيام المسيحيين… اصوم صيام مسلمين والمسحيين مع بعض ؟ وفي الآخر أدخل النار”.
واسترجع “صابر” ذكرياته في المرحلة الابتدائية فكتب في بوست طريف: “وانا في ابتدائي كنا صايمن في واحد من صحابي طلع ساندوش فول وبياكل قدامي وبيقولي الفول ما يفطرش فرحت وبقيت اكل معاه كل يوم فول، بعدها عرفت انه مسيحي”.
