ايييييييييييه يااخوانا هي سايبة.. مفيش حاجة اسمها حقوق ملكية فكرية ولا بدل عرق ولا براءة اختراع.. كل دول العالم عايزة تطبق السيناريو المصري.. والله زمان ياام الدنيا.
بيان الجيش.. هذا الشعب لم يجد من يحنو عليه.. فوضوني لمحاربة الإرهاب المحتمل.. ليس لنا رغبة في حكم (…).. الإرهاب يضرب البلاد.. قررنا النزول على رغبة الشعب والترشح للرئاسة لمواجهة الإرهاب.. تسلسل باين انه عجب العالم كله فقرر انه يستعيره في أي دولة يحصل فيها شوية قلبان.. ياجدعان ماشي بس ينفع تكون دي فكرتنا وتتنتش كده ونخرج م المولد بلا حمص.. الراجل بتاعنا بيقول مفيش.. البلد فينيتو.. الفلوس خولصت.. الرغيف هنقسمه اربعة وهنعيش باللنض الموفرة.. يعني اللي عنده دم أحسن م اللي عنده عزبة.. اللي لطش أفكارنا يدفع عليها فلوس.. وبالعملة الصعبة.. مش هنخدم أهاليكو احنا.
في ليبيا، حفتر طلب التفويض من يومين والمظاهرات في بنغازي وطرابلس خرجت النهاردة.. ونحن الآن في انتظار اعتصام “أجدابيا العدوية”، والذي سيفضه الجيش والشرطة الليبية أي يوم 14 في الشهر.. وتبقى كملت.
أما في تايلاند الراجل جاب م الآخر.. أيوه ده انقلاب عسكري فييييييي حاجاااااااة؟!!.. وعشان كده نطول كذا مرحلة ودلوقتي المطرب “ياكوهاكيني جا سي مي” بيحضر لأغنية الانتخابات “قوم نادي ع البانكوكي وابن اخوه الهواهيني والشباب الشيانج مامي اللمة دي لمة مغول”!!
محمد أبو المجد
يا خبر
