بسم الله الرحمن الرحيم
عنوان المقال حلمت ياناس بس ياخوفي ليتحقق الحلم اللعين
بقلم الكاتب احمد عصفور ابواياد
يهالايام الواحد بالشتاء بيبرد وبيحاول يدفي نفسه ، فلقيت افضل شيء شوربة العدس ، لان الراتب مقطوع من سنه واصبحت وجبة الناس للعوطليه زيي ، لان فياض صاحب المعالي بده وطن بلا مناضلين وبلا شرفاء ، واللي مش عاجبه التفصيل الاميركي يشرب البحر ، وهيك مظبطه بدها هيك ختم ، والاستمرار بالنضال للتحرير ، نمت والظاهر ثقلت العيار حبتين الا ماشاء الله باحلم وحلم كتير جميل ، للوطن اللي اسمه فلسطين ، ارجوكوا خذوني علي قد حالي ومابدي فزلكات لان اخوكو ضاوي ، الا ياخي واحد بيصحيني وبيقولي اسمع وخبر هيك بده يجري وهيك بده يصير ، باقوله شو اللي بده يجري ويصير ، قالي عندكم بغزه اسرائيل بالكبنيت واجتماع عاجل قررت الاعتراف بدولة حماسكو غزه وتقر بشرعية دولة دينيه ، مقابل هدم الانفاق وتامين الحدود ، وضب المخربين اللي بيطلقوا الصواريخ علي الامنين من الاسرائيليين ، وحيكونوا كرماء اليهود ويفتحوا المعابر ويشتغل ميناء غزه وتكون رحلات ترفيهيه وسياحيه بين قبرص وغزه ، وحضروا حالكم ياغزاويه الفرج قريب وحتاكلوا مهلبيه ، باقلوا والضفه ، قال لاتتسرع انا حاقلك بس اكمل ، بعد 9 يناير حيكون عندكم رئيسين ومجلسين تشريعي وحكومتين ، ياعيني زغردي يانائله والله الناس عندهم رئيس عنا اثنين ، والناس لها دوله احنا انا دولتين ، وشو بدك يانائله من احلي هيك تركيبه ، نصيف بغزه ونشتي بالضفه الغربيه ، اما الضفه ياخبيبي بالكبنيت اتفقنا انها تحت بساطير الجيش الاسرائيلي ولكن لكم دوله بس الاستيطان والجدار وكمان القدس تنسوها وتنسوا الدار ، الامن لنا وانتم لكم مكاتب ورئاسه تسن قرارات وماتساوي الحير اللي تكتب بيها ، ولكم مستشارين وقوات امن لحفظ النظام وتفكيك خلايا المخربين ، ونطلق عليكم الخواجيات وهات تبديل ، ونعمل هدنه خبيبي 25 سنه ، انتم بامان واحنا بامان ، وبهيك بنحل القضيه ولكم دولتين وعيشه هنيه ، باقولوا طيب واللاجئين ضحك وقال ماقريت ورقة جنيف عبد ربه وبيليين خلص بح اللاجئين وفيه بدالوا خبيبي توطين ، وتعويضات كتير بس من ذقون دول عربيه هبله نفطيه وانتم حتظلوا شحادين ، والماء حولناه ونعطيكم بالقطاره واذا مانتم راضيين وادي النيل قريب خدوه وشربوا العطشانين ، صحيت من نومي مذعور علي حلم صهيوني لئيم ، بيخطط واحنا بنشخبط ومختلفين ، ياخوفي هالحلم يتحقق لان عدونا لئيم واحنا علي الكراسي متكالبين ، وينك يابوعمار انت والياسين ، من هالولدنه اللي بتصير بالوطن وماشاء الله سياسينا شبعانين والمواطن لازم يكون مطيه وعبد مش هيك مظبطه بدها هيك ختم ، اصحوا يانايمين الوطن بنباع وانتم تتحاربوا علي كرسي هزيل خازوق حطوا الاحتلال لكم وين المقاومه وين صهيل الخيل يابن الوليد من هدول اللي بالعسل نايمين ، وياخوفي ليتحقق الحلم وننداس وغيرنا بيبوس اللحي والذقون وطن حنضيعه لعيونك يالفني انتي وبنيامين ، وكل عام وانتم بخير ، وخليكم بالعسل نايمين ، ودمتم ودام وطن معروض للبيع مين يشتري من تعبانين ، ودام الوطن بالعز باسمك يابوعمار انت والياسين والغياري علي الزناد دايسين مع مودتي .
.
