بقلم : منذر ارشيد
ابو العبد الفلسطيني يعيش الحزن الشديد منذ أن رحل القائد والرمز ياسر عرفات
وما عاد يمرح ولا يغني مواويله الفلسطينية والميجانا والعتابا كما كان من قبل وقد كان يرى في رمز الوطن والثورة أبو عمار الأمل والرجاء” ولكن بعد رحيل الياسر الرمز ما عاد أبو العبد يخرج من البيت وقد اعياه المرض من شدة الحزن وكان دائما يبث أحزانه لصديقه ابو علي ومنذ أن فقد الوطن أعز أبنائه ورجاله من القادة الشهداء الكباركالشيخ ياسين والرنتيسي وأخيراً الرمزالكبير قائد الأمة ياسر عرفات ” يدخل صديقه أبو علي وهو فرح جداً بخبر سمعه لعله يعيد الفرحة إلى قلب الصديق والأخ أبو العبد
أبو علي : كيف حالك اليوم يا ابو العبد بالله عليك تزيح هالكشرة يا زلمة
أبو العبد : ولك يا صاحبي كيف بدك اياني أفك الكشرة يا ابو علي وانا شايف لك تبدلت غزلانها بقرودها ..خربااااااااااااات يا أبو علي خربت ….خربت
أبو علي : له يا زلمة كيف خربت يا ابو العبد ..!! ولسة في الناس خير
ابو العبد : أي خير يا راجل ما ظل في خير اسكت اسكت
أبو علي : له يا زلمة….. المثل بيقول ………… إن خليت بليت يا عمي ..!
أبو العبد : هيء…. ولك مهي بليت” شو بدك أكثر من هيك بلاوي يا زلمة .!
أبو علي : البركة بالموجودين يا أخوي يا أبو العبد وانت شايفهم كثار
أبو العبد : صح كثار بس بدون بركة “ وعدي رجالك عدي من الإقرع للمصدي”
ولك يا ابو علي ولك يا زلمة لمن كان أبو عمار الياسر
ولك كان مثل الفُريرة ” ما كان يهدأ… لا ليل ولا نهار “ يعمل قد ألف واحد “كان أبو عمار ورشة عمل عن ألف عامل
أو علي : ول ول يا ابو العبد يا زلمة هاظا إنت بدك تقطع الخير من الدنيا يا زلمة..! أبو عمار ما فيه مثله يا أخي وما تنسى إنه عمل اللي عمله باربعين سنة ”وانت بدك اياهم يصيروا مثله بيوم وليله ..!!
أبو العبد : ولك هاظا ياسر ولك ” هاظا ياسر” مش حايا الله إنت بتعرف شويعني ياسر …!!! هاظا اللي قاد الثورة ” ثورة الفتح أم العواصف اللي أرهبت بني صهيون بعد ما انتكست كل الجيوش العربية …..هاظا ياسر…. ياسر يا عمي مش حاي الله
ابو علي : آه والله إنك صدقت ياسر صحيح … طيب شو رايك وإذا بيرجع ياسر
أبو العبد : شو بتحكي يا ابو علي ..!! أي هو اللي بيموت بيرجع ..!!
خلص يا عمي ما راح نسمع فيه إلا كل سنة بنتحتفل في مهرجانات وبنرقص فيها وبتغني ……… وينك يا ياسر ..!!
أبوعلي : إسمع يا ابو العبد والله إني سمعت أنه ياسر راجع “ وعلى فتح كمان
أبو العبد : أسكت يا زلمة بلاش هبل كيف بدو يرجع ..!!
إنت بدك تتخوت علي والله عيب عليك يا رجل خليك جدي
..!
..!
أبو علي يا زلمة أنا بحكي عن جد لأني سمعت بالأخبار إن ياسر الثاني اللي بالي بالك بدو ينضم لفتح
ابو العبد : كيف بدو ينضم الله يرحمه ….!! ما هو اللي أسسها يا زلمة
أبو علي : إنت مش فاهمني يا أبو العبد هاظا يا سيدي سمعت لك إن ياسرالثاني يا زلمة اللي بالي بالك ..” هذا اللي طلع لنا بالسحبة يا راجل ……. بدو ينضم لفتح ……وهيك بنكون ما خسرنا شيء”” وهاي ياسر محل ياسر ومش بقولوا بالمثل جمل محل جمل برخ
أبو العبد يقوم من مكانه ويلوح بعصاته في وجه أبو علي ويصرخ : ولك يا ابو علي ولك شو اللي بتقوله ..!! إنت انجنيت ” يلعن أبو هالصحبة اللي بيني وبينك ولك مين هاظا التافه ..!!!
ولك ياسر هذا محل ياسر البطل ….ولك شو جمل برخ وما برخ ..!!
ولك ياسر جمل المحامل بدك تحط هذا الأرنب وتعمله جمل ..!!
صحيحاللي قال تبدلت غزلانها بقرودها
ولك هاظا……ياسر القائد…..ياسر زعيم الأمة…… ياسر أبو الكوفية
أبو علي : بسيطة بلبس الكوفيه يا زلمة أي هي شغله ..!!
أبو العبد : شو بتقول ولك شو بتقول ..!!
ولك كل من لبس الكوفية صار زلمة وقائد ..!!
لعاد لبس أولمرت الكوفية وقول هاي أبو كوفية الفلسطينية
ولك ما هن النسوان السايحات بيلبسن الكوفية إنت ما بتشوفهن وهن لافاتها على رقباتهن أو على وسطهن
ولك الكوفية بعد أبو عمار صارت ممسحة وملوحة وزنار رقص
ولك مش عيب عليك تجيب إسم هذا المهوي وتحطة مع إسم هذا الطاهر ..!!
ابو علي : يا زلمة إنت ليش عصبت يا عمي… وانا شو دخلني هم اللي بيقولوا هيك مش أنا يا عمي ….. أنا يا عمي ما بطيق أسمع باسمه
أبو العبد : ولك ولك شو بتحكي ولك هاي فتح …هاي أم الثورات .هاي فتح العظيمة أم الأبطال والشهداء ..ولك فعلا اللي استحو ماتوا
يعني كنا نقول في أمل في اللي بقيوا ” ولك بتعرف إن صار هالحكي شويعني ..!
يعني على فتح السلام
ولك أي هي فتح ناقصها سُقط وفاسدين “”ما بكفيها الي فيها..!!
ولك هاي فتح مش مزبلة ولا مكب نفايات فتح يا عمي راح تنهض وكلها اكم يوم وبتسع الأخبار اللي بتسرك لما ينعقد المؤتمر
أبو علي : يا خوي المؤتمر .المؤتمر صار النا خمس سنوات بنسمع بالمؤتمر .!
أما بتعرف والله يا ابو العبد قولتك والله حرام هاي فتح أبو عمار وأبو جهاد وأبو إياد وأبو علي وسعد صايل ….والله حرام ياعمي….و بكفي الاف الشهدا اللي سقطوا فيها على الأقل من شان أرواح الشهدا لازم يحافظوا عليها وتظل نقية ونظيفة
أبو العبد : أي هيك إحكي ونظف لسانك
ولك أحنا بنقول ان المؤتمر اللي جاي بدو ينظفها من الفاسدين والساقطين والمنحرفين ………ول أي إذا بدوا يكون هذا فيها ….ولك لويش تتنظف وتصير مليحة خليها مثل ما هي أحسن ..!! شو بتحكي ..!! ياسر هذا أعوذ بالله من الشيطان الرجيم ..!
أبو علي : دخلك يا أبو العبد إنت ليش غضبت لهالدرجة .! مين هو هاظا ياسر ..!
أبو العبد : هاظا يا اخوي ما خلا تنظيم من شره وطول عمرة شر وبارد وجه وما من ورائه أي خير بس شغلته الفساد “ من الجبهة الشعبية إلى الديمقراطية إلى فدا إلى أبصر وين..! يوم مع بيرس ويوم مع بلين مش عارف شو اسمه تاع جنيف ولعانة الوالدين …ما ظل إلا فتح …..مسكينة يا فتح …صارت معقول تصير ملطة بعد ما كانت قلعة شامخة والله ما بصدق “
أي هذا معقول يا راجل والله انها بتكون الدنيا آخر وقت …
أبو علي : أنا يا عمي ما دخلني سمعت هاظا الحكي في الأخبار ” لا تزرم علي ولا على بالك …. وخلينا صحبي أحسن
أبو العبد : أي هو انت خليت صحبه يا أبو علي.! ما انت طيرتها من راسي…. قال ياسر قال” أي شو جاب لجاب..!!!! شوف ترى أنا بعرف كيف يتصير هالشغلة..!!
بالأول بيعملوها فتيشة وبعدين بتصير عن جد ……ولك ما سمعت كيف قالوا عن أبو عمار قبل ما يموت
أبو علي : شو قالوا يا ابو العبد ..!!!!
أبو العبد : قالوا إنه خرفن” وقالوا إنه خلص بيكفيه عاد.. وصار عبء علينا ولازم يِصُف ويِطفي “ آه…. ما احنا كل يوم كنا نسمع هيك حكي .. بتعرف ليش كانوا يقولوا هيك ..!!
من شان لما يروح نكون متعودين على الموضوع “ ونوخذه بكل بساطة ”وهاي انت شايف……… أربع سنين ولك سمعت في حدا سائل عن أبو عمار كيف ومين اللي سممه ..!!
وهاي مثل ما شفت راح أبو عمار بشربة مي……. ولا من شاف ولا من دري ..!!
ولك لحد هسَ ما حدا عارف مين اللي سممه
أبو علي : كيف ما حدا عرف ..!! يا عمي الاسرائيليين هم اللي قتلوه
أبو العبد : أي نعم صحيح بس مين اللي دس له السم يا شاطر ..!!
أبو علي : أي والله صدقت مين اللي دس له السم ..!!
أبو العبد : أي والله ما ظل في الخم إلا ممعوط الرقبة
ولك بدي أنجن هاظ الهامل محل الرمز الكامل ..!!
وبكرة بتشوف هاظا الهامل متزعم المنظمة …أقول لك كمان أكثر …. .بكرة بيطيروا أبو مازن …. لأنه بلش يحكي عن الثوابت والقدس واللاجئين …يا عمي بيلعبوا مع الاميركان لعب مرتب شو بدك بالحكي ….بكرة بيزحلقوه وبيحطوها برقبة الي في غزة بتشوف ..!!
أبو علي :/ بالك يا ابو العبد الفتحاويين بيسكتوا ..!!
أبو العبد : شو بتحكي يا زلمة ليش هو أبو عمار بس للفتحاويه لوحدهم ..!!
أبو عمار للشعب الفلسطيني كله
شوف أنا برأيي ما بيسكتوا وخاصة أنه في ظل منهم من رفايق أبو عمار وأبو جهاد ” بعد فيهم بركة “ وهظول ما بيسكتوا بكرة بتشوف…. هم خانسين تا يشوفوا وين بدها تصفي الأمور..!
وإن صار لعب هيك ولا هيك..! مش راح يسكتوا…..هاي فتح مش لعبة هاي أم الثورة والثوار…. مش إختم هالمزبطة يا مختار ..!!
أبو علي : طيب وان مشوا اللي براسهم ….. وجابو هاظا أبو ريالة شاطة هون وهون ”بالك وإن حطوه غصباً جبراً …!!
أبو العبد : كيف .! غصباً جبراً ..! هاظا إنت بتحلم ولك هذا شعب فلسطين ولك شعب الجبارين ” انت شايفهم هس ساكتين ” بس والله بكرة بتشوفهم كيف بينهضوا
وبعدين ولك أي هو أبو عمار للفتحاويين لوحدهم ..! أبو عمار لكل الشعب الفلسطيني ” ولا تنسى إن الفتحاويين مش قلال ولحمهم مُرْ ” بس هم بيصبروا
وبيتحملوا مش مثل غيرهم ”وبعدين بتشوفهم كيف بينهضوا وبيصلحوا أحوالهم
وبعدين لويش مستعجل ..!! يا سيدي خليها لوقتها…. كل شي بوقته حلو يا ابو علي…. وروق وروقنا …. وصلي على النبي ….. .وكلها اكم يوم وبنشوف المؤتمر
وبعدها بنحكم عليهم ” ويا رب الله يوفقهم ويعودوا أحباب وأصحاب وينتبهوا لقضيتهم وثوابتهم الوطنية
منذر ارشيد
